Gjermania planifikon terminal të posaçëm për dëbime në Aeroportin e Mynihut
Gjermania po ndryshon politikën e saj të azilit, duke synuar dëbimin më të shpejtë të azilkërkuesve të refuzuar. Në këtë kuadër, një projekt i ri është duke u planifikuar në Aeroportin e Mynihut (MUC), aeroporti i dytë më i madh në vend, që pritet të shërbejë si qendër për riatdhesimin e migrantëve.
Sipas agjencisë së lajmeve Reuters, plani parasheh ndërtimin e një “terminali riatdhesimi” me dy kate, që do të mundësojë nisjen e deri në 50 fluturime çarter në ditë, si individuale ashtu edhe kolektive. Terminali i ri do të përfshijë edhe një tavolinë qendrore regjistrimi për të koordinuar procesin e dëbimit në mënyrë efikase. Ndërtimi pritet të përfundojë deri në fund të vitit 2028.
Një zëdhënës i kompanisë që menaxhon aeroportin konfirmoi se ndërtesa do të shërbejë për Policinë Federale, ndërsa projekti po mbështetet nga Ministri i Brendshëm i Bavarisë, Joachim Herrmann, dhe Ministri i Brendshëm gjerman Alexander Dobrindt, të dy nga partia konservatore CSU, që kanë kërkuar vazhdimisht dëbime më të rrepta për migrantët e refuzuar dhe kriminelët e huaj.
Megjithatë, ky projekt ka ngjallur edhe debat politik. Deputetja rajonale Gülseren Demirel nga partia Aleanca90/Të Gjelbrit e kritikoi idenë e një terminali të posaçëm për dëbime, duke e konsideruar si të diskutueshme. Në anën tjetër, kryetari i bashkisë së Mynihut, Dieter Reiter nga SPD, u shpreh se “nuk është një ide e keqe, në parim”, sidomos në rastet kur bëhet fjalë për riatdhesimin e kriminelëve.
Projekti është diskutuar edhe në qytetin Freising, në veri të Mynihut, ku ndodhet një pjesë e aeroportit. Komisioni i planifikimit të qytetit ka refuzuar vendndodhjen e propozuar për ndërtesën për arsye planifikimi, ndërsa pritet që autoritetet rajonale të shqyrtojnë raportin zyrtar të qytetit në vijim.
Aeroporti i Mynihut, një nyje kryesore për Lufthansa-n, aktualisht ofron fluturime drejt 216 destinacioneve në 68 vende përmes 73 linjave ajrore. Terminali i ri do t’i shtohet dy terminaleve ekzistues të pasagjerëve.
